Fau que lou Cacho-Fio siegue un aubre fruchau (ameliè, ouliviè...) mai jamai uno figuiero car lou bos de figuiero brulo pas bèn e se lou Cacho-Fio brulo pas bèn es uno marrido marco pèr tout l’an. Fau que l’aubre siegue mort de mort naturalo : derraba pèr lou vènt, brula pèr la fre, lou gèu...
L’aubre fruchau es simbole de la famiho, l’aubre a de fru, li parent an d’enfant. Lou plus einat d’un bout, lou cago-nis de l’autre tènon lou Cacho-Fio : es lou simbole de la countinueta de la famiho, de la passacioun dou poudé, di couneissènço, di tradicioun. Touti fan tres cop lou tour de la cousino o de l’oustau se fai bèu tèms. Ansin l’oustau es envirouna d’uno meno de ciéucle de prouteicioun. Arriba davans la paiasso dou fio, lou grand escampo sus lou Cacho-Fio tres gisclado de vin cue en disènt :
ALègre ! Alègre
Mis bèus enfant Diéu nous alègre !
Emé calendo tout bèn vèn !
Diéu nous fague la graci de vèire l’an que vèn !
E se noun sian pas mai que noun fuguen pas mens !
Devié èstre lou meme Cacho-fio jusqu’au jour di Rei, alor chasque vèspre lou metien un pau dins la chaminèio pièi lou levavon. Li braso aparavon dou tron e de l’encèndi.
